རྒྱལ་སྤྱིའི་བོད་དོན་ལས་འགུལ་ཁང་།
Currently Browsing: ༧གོང་ས་མཆོག

༄༅། །ཤུགས་ལྡན་རྗེས་འདྲང་པས་རྔམ་སྟོན་བྱེད་བཞིན་པར་རྒྱལ་སྤྱིའི་བོད་དོན་ལས་འགུལ་ཁང་གི་བསྒྲགས་གཏམ།

༄༅། །རྒྱལ་སྤྱིའི་ཤུགས་ལྡན་སྤྱི་ཚོགས་ཟེར་བའི་མིང་ཐོག་ནས་ནང་པ་འགའ་ཞིག་གིས་རྔམ་སྟོན་བྱས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་ལ་བདོ་བའི་བྱ་སྤྱོད་སྤེལ་གྱི་ཡོད་པའི་ཐོག་རྒྱལ་སྤྱིའི་བོད་དོན་ལས་འགུལ་ཁང་ལ་དངངས་འཚབ་བྱུང་།
གནད་དོན་དེ་རྩ་འཛིན་འཕེར་བ་ཡོད་མེད་ནི་ནང་པའི་མཁས་པ་ཚོས་གཟིགས་རྒྱུ་ཡིན་། འོན་ཀྱང་ང་ཚོའི་བློ་འཚབ་ནི་ཤུགས་ལྡན་རྗེས་འདྲང་པ་རྔམ་སྟོན་བྱེད་མཁན་ཚོས་བོད་ཀྱི་གནད་དོན་སྤྱི་ལ་གནོད་སྐྱོན་ཆེན་པོ་བྱེད་ཀྱི་ཡོད་པ་དེ་ཡིན། བོད་ནང་བོད་མི་ཚོ་རྒྱ་ནག་དབང་འཛིན་པའི་དབང་འོག་དུ་ཡ་ང་སྙིང་རྗེ་མེད་པའི་དྲག་གནོན་འོག་སྡུག་བསྔལ་མྱོང་བཞིན་ཡོད་པ་དང་། གནས་སྟངས་དེ་འདྲ་ཞིག་འོག་བོད་ནང་བོད་མི་ཚོས་རང་གི་སྲོག་ཚུན་བློས་གཏོང་བྱས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་རྒྱུ་དང་བོད་ལ་རང་དབང་དགོས་པའི་འདུན་པ་སྒྲོག་བཞིན་ཡོད།
རྒྱ་ནག་གཞུང་གིས་ཁོང་ཚོས་བོད་དབང་བསྒྱུར་བྱས་པ་དེ་ཁྲིམས་མཐུན་བཟོ་ཐབས་ལ་ལམ་ལྷོང་མ་བྱུང་བའི་འབྱུང་རྐྱེན་དེ་དུས་རྟག་ཏུ་༸གོང་ས་༸སྐྱབས་མགོན་ཆེན་པོ་མཆོག་ཡིན་པར་ངོས་འཛིན་བྱས་ནས་མགོན་པོ་མཆོག་དང་བོད་མི་ཚོ་དབར་འབྲེལ་བ་མེད་པར་བཟོ་ཐབས་བྱེད་ཀྱི་ཡོད། དེར་བརྟེན་རྒྱ་ནག་དམར་པོའི་སྲིད་གཞུང་གིས་༸གོང་ས་མཆོག་གི་ནུས་པ་མེད་པར་བཟོ་བའི་རེ་འདོད་དེ་བསྒྲུབ་རྒྱུར་ རྗེས་འདྲང་པ་རྔམ་སྟོན་བྱེད་མཁན་ཚོས་གཞོགས་འདེགས་བྱེད་ཀྱི་ཡོད། ༡༩༥༩ ལོར་བོད་མི་ཚོས་ཁ་གཅིག་བསྒྲགས་ཐོག་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་། ངོ་བོ་བཅས་རྩ་གཏོར་གཏོང་ཐབས་བྱས་པར་ངོ་རྒོལ་སྒེར་ལངས་བྱས་ཡོད་པ་དང་། དུས་དེ་ནས་བཟུང་ད་བར་གནས་སྟངས་ལ་འགྱུར་བ་གང་ཡང་སོང་མེད།
རྔམ་སྟོན་བྱེད་མཁན་ཚོས་ཆོས་དད་རང་དབང་དང་འགྲོ་བ་མིའི་ཐོབ་ཐང་ལ་སོགས་པ་བེད་སྤྱོད་བྱས་ནས་རང་གི་གནད་དོན་དེ་གསལ་བཤད་བྱ་ཐབས་བྱས་ཏེ་མི་མང་མགོ་བསྐོར་གཏོང་རྒྱུའི་ཐབས་ཤེས་བྱེད་ཀྱི་འདུག ང་ཚོས་ཤེས་ཡག་ལ་ཤུགས་ལྡན་གྱི་རྩོད་གཞི་དེ་མགོ་རྙོག་ཅན་ཞིག་ཡིན་་པ་དང་། མི་རྣམས་ཀྱིས་རྩོད་གཞི་དེའི་སྐོར་ལ་གོ་རྟོགས་གསལ་པོ་བྱེད་ཐུབ་པ་གནང་དགོས། དགའ་ལྡན་ཕོ་བྲང་གི་གཞུང་འབྲེལ་དྲ་རྒྱ་དང་། དབུས་བོད་མིའི་སྒྲིག་འཛུགས་ཀྱི་དྲ་རྒྱ་དང་། དེ་བཞིན་བོད་ཁང་ཐོུང་གི་དྲ་རྒྱ་སོགས་ཀྱི་ནང་རྩོད་གཞི་ཅན་གྱི་གནད་དོན་དེའི་སྐོར་ལོ་རྒྱུས་ཀྱི་རྒྱབ་ལྗོངས་དང་བྱུང་རིམ་རྣམས་གསལ་པོར་བཀོད་འདུག བོད་ཀྱི་ཆོས་དང་རིག་གཞུང་སྲུང་སྐྱོབ་ལ་སེམས་འཚབ་ཡོད་མཁན་ཚང་མས་ད་ལྟའི་དུས་སྐབས་འདི་བོད་ནང་བོད་མི་ཚོས་དངོས་སུ་དཀའ་སྡུག་མྱོང་བཞིན་པར་དོ་སྣང་བྱེད་དགོས་པ་དེ་རེད།
ད་ལྟའི་དུས་འདིར་བོད་ཀྱི་ཆོས་དང་རིག་གཞུང་གཅེས་སྲུང་ལ་ཐུགས་འཁུར་ཡོད་མཁན་རྣམས་ནས་བོད་མིའི་བདེ་སྡུག་གི་འབྱུང་ཁུངས་ངོ་མ་གང་ཡིན་པ་དེར་གཟིགས་དགོས། གལ་ཏེ་ཤུགས་ལྡན་རྗེས་འདྲང་པ་རྔམ་སྟོན་བྱེད་མཁན་ཚོས་བོད་མིའི་ཆོད་དད་རང་དབང་དང་འགྲོ་བ་མིའི་ཐོབ་ཐང་སྲུང་སྐྱོབ་ལ་དངོས་འབྲེལ་བློ་འཚབ་བྱེད་ཀྱི་ཡོད་ན་རང་ཕྱོགས་ཀྱི་ཁེ་ཕན་ཁོ་ན་མ་བསམ་པར་བོད་ནང་བོད་མི་ཚོས་དངོས་ཡོད་དཀའ་སྡུག་མྱོང་བཞིན་པ་དེ་ནས་ཐར་ཐབས་ལ་དོ་སྣང་བྱེད་དགོས་པ་ཡིན། ཤུགས་ལྡན་རྗེས་འདྲང་པ་ཁོ་རང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་བསྐུར་འདེབས་ཞུ་རྒྱུ་ཁོ་ནར་དམིགས་ནས་ནུས་ཤུགས་འདོན་གྱི་ཡོད་ཞེས་ངོས་ལེན་བྱས་ཡོད།

༢༠༡༤ཟླ་༡༠ཚེས་༣༡ ལ།

 

ཟླ༡༠ཚེས་༢༡ནས་༸གོང་ས་མཆོག་ཁེ་ན་ཌ་དང་ཨ་རིར་ཆིབས་སྒྱུར་བསྐྱང་གཏན་འཁེལ་བ།

༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༢༡ ཉིན་གྱི་ཕྱེད་ཡོལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁེ་ན་ཌའི་བྷི་སི་མངའ་ཁོངས་ཀྱི་ཝན་ཁོ་ཝར་གྲོང་ཁྱེར་དུ་ (Vancouver, BC, Canada) རྒྱལ་སྤྱིའི་ཚན་རིག་པ་གྲགས་ཅན་དང་ལྷན་དཔལ་འབྱོར་གྱི་སྐོར་དང་ཀླད་རྩའི་ཚན་རིག སེམས་ཁམས་རིག་པ། སྤྱི་ཚོགས་ལ་ཕན་པའི་སྲིད་བྱུས་ལག་ལེན་བསྟར་སྟངས་བཅས་དང་འབྲེལ་ནས་བྱམས་བརྩེ་གོང་འཕེལ་གཏོང་ཐབས་ཀྱི་ཤེས་ཡོན་ཚན་རིག་ (Science of Education of the Heart) སྐོར་ལ་བཞུགས་མོལ་ཚོགས་འདུ་མཛད་རྒྱུ་དང་། ཕྱི་ཚེས་ ༢༣ ཉིན་ཁེ་ན་ཌའི་བྷི་སི་མངའ་ཁོངས་ཀྱི་ཝན་ཁོ་ཝར་གྲོང་ཁྱེར་དུ་བྷིར་ཊི་ཤི་ཁོ་ལམ་བྷེ་ཡ་བོད་ཀྱི་རིག་གཞུང་ཚོགས་པ་ (Tibetan Cultural Society of British Columbia) དང་། མཚན་སྒྲོག་དགོན་པ་གཉིས་ཀྱིས་ཇི་ལྟར་གསོལ་བ་བཏབ་པ་ལྟར་ (UBC Thunderbird Arena) དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་བཀའ་ཆོས་དང་སྤྱན་རས་གཟིགས་ཀྱི་བཀའ་དབང་སྩལ་རྒྱུ་ཡིན་འདུག

ཕྱི་ཚེས་ ༢༥ ཉིན་ཨ་རིའི་ཨ་ལ་བྷ་མ་ (Alabama) མངའ་ཁོངས་བྷར་མིང་ཧམ་ (Birmingham) གྲོང་ཁྱེར་དུ་ཨ་ལ་བྷ་མ་གཙུག་ལག་སློབ་གྲྭའི་གོ་སྒྲིག་འོག་ཀླད་རྩའི་འགྱུར་ལྡོག་དང་གསོ་ཐབས་ (Neuroplasticity and Healing) ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་དང་། ཕྱི་ཚེས་ ༢༦ ཉི་གྱི་སྔ་དྲོ་ཨ་རིའི་ཨ་ལ་བྷ་མ་མངའ་ཁོངས་བྷར་མིང་ཧམ་གྲོང་ཁྱེར་དུ་ཆོས་ལུགས་ཁག་གི་མི་སྣ་དང་མཉམ་དུ་ཆོས་དད་ཀྱི་རྭ་བ་ལས་བརྒལ་བ་ (Beyond Belief) ཞེས་པའི་བརྗོད་གཞིའི་ཐོག་བགྲོ་གླེང་ལ་ལྷན་ཞུགས་མཛད་རྒྱུ། ཕྱི་ཚེས་ ༢༦ ཉིན་རྒྱབ་ཨ་རིའི་ཨ་ལ་བྷ་མ་མངའ་ཁོངས་བྷར་མིང་ཧམ་གྲོང་ཁྱེར་གྱི་རི་ཇན་སུ་ཕིལ་ཌ་ (Regions Field) ཞེས་པར་ཆོས་ལུགས་དང་མ་འབྲེལ་བའི་བཟང་སྤྱོད་ (Secular Ethics in Our Time) ཅེས་པའི་བརྗོད་གཞིའི་ཐོག་མི་མང་ལ་བཀའ་སློབ་སྩལ་རྒྱུ།

ཕྱི་ཚེས་ ༣༠ ཉིན་ཨ་རིའི་བྷོ་སི་ཊོན་གྲོང་ཁྱེར་དུ་ཝི་ཏི་ནམ་ནང་པའི་ཚོགས་པས་ (The Vietnamese Buddhist community) ཇི་ལྟར་གསོལ་བ་བཏབ་པ་ལྟར། ཝང་སྒྱུ་རྩལ་འཁྲབ་སྟོན་བསྟི་གནས་སུ་ (Wang Centre for Performing Arts) དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མ་དང་སེམས་བསྐྱེད་སྩལ་རྒྱུ། ཕྱི་ཚེས་ ༣༡ ཉིན་གྱི་སྔ་དྲོ་ཨ་རིའི་བྷོ་སི་ཊོན་ (Boston) གྲོང་ཁྱེར་དུ་སེམས་དང་སྲོག་ཚོགས་པའི་ (Mind and Life Institute) གོ་སྒྲིག་ལྟར། བྷོ་སི་ཊོན་མེ་རི་ཡ་ཊ་ཀོབ་ལེ་ (Boston Marriott Copley) རུ་སྒོམ་སྒྲུབ་ཉམས་ལེན་གྱི་ཉམས་ཞིབ་ཐོག་རྒྱལ་སྤྱིའི་ཚོགས་འདུར་ (International Symposium for Contemplative Studies) ལྷན་ཞུགས་མཛད་རྒྱུ་དང། ཕྱི་ཚེས་ ༣༡ ཉིན་རྒྱབ་༸གོང་ས་ཏཱ་ལའི་བླ་མའི་ཡ་རབས་སྤྱོད་བཟང་དང་སེམས་ཀྱི་འགྱུར་བའི་རིན་ཐང་སྦྱོང་བརྡར་བསྟི་གནས་ (The Dalai Lama Centre for Ethics and Transformative Values) ཁང་ནས་གོ་སྒྲིག་ལྟར། ཨ་རིའི་བྷོ་སི་ཊོན་གྲོང་ཁྱེར་དུ་འཛམ་གླིང་བཟང་ཕྱོགས་སུ་འགྱུར་བ་གཏོང་མཁན་རླབས་ཆེན་མི་སྣའི་ཚོགས་འདུའི་བགྲོ་གླེང་ལ་ལྷན་ཞུགས་མཛད་རྒྱུ།

དེ་བཞིན་ཕྱི་ཟླ་ ༡༡ ཚེས་ ༡ ཉིན་གྱི་སྔ་དྲོ་ཨ་རིའི་བྷོ་སི་ཊོན་དུ་བོད་རིགས་སྤྱི་མཐུན་ཚོགས་པའི་བཀོད་སྒྲིག་འོག་ (TD) སྐྱེད་ཚལ་དུ་ཀླད་སེམས་གཉིས་ཀྱི་ཤེས་ཡོན་ (Educating the Heart and Mind) ཞེས་པའི་བརྗོད་གཞིའི་ཐོག་མི་མང་ལ་བཀའ་སློབ་སྩལ་རྒྱུ། ཕྱི་ཚེས་ ༢ ཉིན་ཨ་རིའི་ནིའུ་ཡོཀ་གྲོང་ཁྱེར་དུ་ཟླ་སྣང་ཐེབས་རྩ་ཚོགས་པས་ཇི་ལྟར་གསོལ་འདེབས་ཞུས་དོོན་ལྟར། མན་ཧ་ཊན་བསྟི་གནས་ (Manhattan Center) ལ་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་བཀའ་ཆོས་དང་སྤྱན་རས་གཟིགས་ཀྱི་དབང་སྩལ་རྒྱུ་ཡིན་འདུག ཕྱི་ཚེས་ ༣ ཉིན་ཨ་རིའི་ནིའུ་ཡོཀ་གྲོང་ཁྱེར་དུ་བོད་ཁང་གིས་གོ་སྒྲིག་ཞུས་ཐོག་བྷེ་ཁན་ཚོགས་ཁང་ནང་ (Beacon Theater) རྗེ་ཙོང་ཁ་པ་ཆེན་པོས་མཛད་པའི་དྲང་ངེས་ལེགས་བཤད་སྙིང་པོའི་བཀའ་ཆོས་སྩལ་རྒྱུ་ཡིན་འདུག་པ་བཅས། །

གནས་ཚུལ་འབྱུང་ཁུངས། དབུས་བོད་མིའི་སྒྲིག་ཚུཊ་ཀྱི་དྲ་ཚིགས།

རྩོམ་པ་པོ་འོད་ཟེར་གྱིས་བྲིས་པའི་དོལ་རྒྱལ་སྐོར་གྱི་བསམ་ཚུལ།

རྩོམ་པ་པོ་འོད་ཟེར་གྱིས་བྲིས་པའི་དོལ་རྒྱལ་སྐོར་གྱི་བསམ་ཚུལ།

 

བོད་ཀྱི་བང་ཆེན་ ༢༠༡༤ ཟླ་བ་ ༥ ཚེས ༡༣ དུས་ཚོད ༥:༡༥༠ ཕྱི་དྲོ།

 

ཏྲེ་ཧོར་ཐུབ་བསྟན་གྱིས་བསྒྱུར།

 

དོལ་རྒྱལ་གནད་དོན་ལ་རྒྱ་ནག་གཞུང་གིས་མངོན་ལྐོག་གཉིས་ནས་ཐེ་གཏོགས་ཤུགས་ཆེན་བྱེད་བཞིན་ཡོད་པར་བརྟེན། སྔར་ནས་ཆོས་ལུགས་ནང་ཁུལ་གྱི་གནད་དོན་གཅིག་པུ་ཞིག་མིན་པར། ཆབ་སྲིད་ཀྱི་གནད་དོན་ཞིག་ཏུ་གྱུར་ཡོད། བལྟས་ཚོད་ལ་བོད་བརྒྱུད་ནང་བསྟན་གྱི་ཆོས་ལུགས་དད་མོས་རང་དབང་རྩོད་ལེན་བྱེད་བཞིན་པ་ལྟ་བུའི་ནུབ་ཕྱོགས་ཀྱི་དོལ་རྒྱལ་རྗེས་འབྲང་པ་དག་གིས། དུས་ནམ་ཡང་བོད་མིའི་བསམ་བློ་ལ་རྒྱུས་ལོན་བྱ་ཐབས་བྲལ་བ་མ་ཟད། དུས་གཏན་དུ་བོད་མིའི་བསམ་བློའི་འཇིག་རྟེན་མཐོང་མི་ཐུབ། དྲང་པོར་བཤད་ན། ཁོང་ཚོས་འཁྲབ་སྟོན་ཞིག་བྱེད་བཞིན་པ་དང་ཧ་ཅང་མཚུངས། བོད་ལ་རྒྱལ་སྤྱིའི་རྒྱབ་སྐྱོར་དགོས་མཁོ་ཡོད་ནའང་། བོད་མི་ལས་ལྷག་པའི་བོད་ལ་རྒྱུས་མངའ་ཡོད་མདོག་བྱེད་མཁན་དག་གིས་ང་ཚོའི་ཆེད་དུ་རྐང་བརྡ་ལག་བརྡ་བྱེད་དགོས་དོན་མེད། མི་དེ་དག་གིས་བོད་བརྒྱུད་ནང་བསྟན་གྱི་མིང་ཐོག་ནས་བོད་ལ་དཀའ་སྡུག་མི་སྟེར་བ་དང་། བོད་བརྒྱུད་ནང་བསྟན་གྱི་མིང་ཐོག་ནས་དུས་ཚོད་དེ་ལྟར་མང་པོ་ཞིག་བཏང་སྟེ་བོད་ཀྱི་གནད་དོན་ལ་ཐེ་བྱུས་མི་བྱེད་པའི་རེ་བ་ཡོད། རང་སྣང་མཐོ་བའི་ཆོས་ལུགས་རྫུན་མ་ཞིག་གི་ཚོར་བའི་ནང་དུ་ཐིམ་ཏེ། མི་སེར་སྤེལ་བའི་དྲག་པོའི་དབང་ཤུགས་ཀྱིས་བོད་ལ་ཁ་གཏད་པའི་མདེའུ་ཞིག་ཏུ་གྱུར་མི་རུང་།

 

རང་ཉིད་བོད་མི་ཞིག་ཡིན་པའི་ངོས་ནས། བོད་ཕྱི་ལོགས་སུ་ཡོད་པའི་བཙན་བྱོལ་བོད་མི་ཡིན་ནའང་འདྲ། བོད་ནང་དུ་ཡོད་པའི་རང་དབང་མེད་པའི་བོད་མི་ཡིན་ཡང་རུང་། འདི་ལྟ་བུའི་བོད་ཀྱི་སྲོལ་རྒྱུན་གྱི་སྤྱི་ཚོགས་རྙིང་པའི་གནད་དོན་ཞིག་ལ་གདོང་ལེན་བྱེད་སྐབས། དེའི་ཁྲོད་ཀྱི་རྙོག་འཛིང་ཆེ་བའི་རྒྱུ་རྐྱེན་ངོ་ཤེས་དགོས། རྒྱལ་ཁབ་ཆེན་པོ་དང་མི་ཆུང་ངུ་མཉམ་དུ་བསྲེས་པ་དང་། ཆབ་སྲིད་དང་སྒེར་དོན། བརྒྱུད་བསྒྲགས་དང་གསང་བ། དྲག་ཤུགས་དང་ཉེས་འཛུགས། ཉོ་བསླུ་དང་རྒྱབ་འགལ་སོགས་ཀྱི་གཡོ་ཇུས་ལམ་ནས། དོལ་རྒྱལ་ཤོག་ཁག་གིས་སྐད་ཅོར་ཆེན་པོས་༧གོང་ས་མཆོག་ལ་སྐྱོན་འཛུགས་བྱེད་བཞིན་ཡོད། གལ་སྲིད་བོད་མི་ཁོང་ཁྲོ་ལངས་པའི་བྱེད་སྟངས་ཐོག་ནས་དོལ་རྒྱལ་ཤོག་ཁག་ལ་དམའ་འབེབས། དཔེར་ན་མཆིལ་མ་འཕེན་པ་དང་། ཅ་ལག་གཡུགས་པ་སོགས་བྱེད་ན། ཕན་ཐོགས་པ་ཕར་བཞག དེ་ལས་ལྡོག་ཏེ་བོད་ཀྱི་མཚན་སྙན་ལ་གནོད་སྲིད། དོལ་རྒྱལ་ཤོག་ཁག་གིས་འཁྲབ་སྟོན་བྱེད་སའི་སྡིངས་ཆ་འདི་ལྟ་བུ་ལ། རབ་ཏུ་བྱུང་ན་ཁ་ཡ་མ་བྱས་ན་བཟང་། གང་ཞིག་བཤད་དང་འཁྲབ་མིན་ལ་མ་ལྟོས་པར་གང་འདོད་ལྟར་ཁོང་ཚོའི་མགྲིན་པ་མ་ན་བར་དུ་འབོད་བཅུག་དགོས། གལ་སྲིད་ཁོང་ཁྲོའི་རྣམ་པའི་ཐོག་ནས་ཚོར་བའི་ལམ་དུ་སོང་བ་ཡིན་ན། ཁོང་ཚོའི་མིག་དབང་འདྲེན་པའི་གོ་སྐབས་འཕར་མ་ཞིག་སྤྲད་པ་དང་མཚུངས།

 

མདོར་བསྡུས་ནས་བཤད་ན། ངའི་སྤུན་ཟླ་ཚོ། བློ་སེམས་རྣལ་དུ་ཕབ་ཏེ། དུས་རབས་ཉེར་གཅིག་པའི་སའི་གོ་ལའི་རང་བཞིན་གྱི་བྱེད་ཐབས་ལ་བརྟེན་ནས། རྟོག་དཔྱོད་དང་ལྡན་པའི་སྒོ་ནས་དངོས་ཡོད་ཀྱི་བདེན་དཔང་ལ་ཁུངས་གཏུགས་ཏེ། རྒྱུ་མཚན་དང་ལྡན་པའི་དངོས་ཡོད་གནས་ཚུལ་རེ་རེ་བཞིན་སྟོན་རོགས་གནང་། མང་གཙོའི་ཐོག་ནས། ཡོངས་གྲགས་ཐོག་དོལ་རྒྱལ་གྱི་རྒྱབ་ཏུ་སྦས་ཡོད་པའི་གསང་བ་ཕྱིར་བསྒྲགས་དགོས། བོད་ཀྱི་ཧ་ལས་པའི་གཡོ་ཇུས་ཤིག་དངོས་སུ་ཁྱུར་མིད་གཏོང་བཞིན་ཡོད།།

 

« Previous Entries

Powered by Wordpress | Designed by Elegant Themes