རྒྱལ་སྤྱིའི་བོད་དོན་ལས་འགུལ་ཁང་།

རྒྱལ་སྤྱིའི་བོད་དོན་ལས་འགུལ་ཁང་ནས་༢༠༡༥ཟླ་༦ཚེས་༡ནས་༦ བར་བོད་མི་ན་གཞོན་གྱི་འགོ་ཁྲིད་ཟབ་སྦྱོང་གནང་རྒྱུ།

རྒྱལ་སྤྱིའི་བོད་དོན་ལས་འགུལ་ཁང་ནས་༢༠༡༥ཟླ་༦ཚེས་༡ནས་༦ བར་ཨ་མེ་རི་ཀའི་བོད་མི་ན་གཞོན་གྱི་འགོ་ཁྲིད་ཟབ་སྦྱོང་ཞིག་རྒྱལ་ས་ཝ་ཤིང་ཊོན་དུ་གོ་སྒྲིག་ཞུ་རྒྱུ་ཡིན། འདི་ནི་ང་ཚོས་ཝ་ཤིང་ཊོན་དུ་གོ་སྒྲིག་ཞུས་པའི་ཟབ་སྦྱོང་ཐེངས་བདུན་པ་དེ་ཡིན།

ཟབ་སྦྱོང་གི་དམིགས་ཡུལ་ནི་ཨ་མེ་རི་ཀའི་བོད་མིའི་སྤྱི་ཚོགས་ནང་མ་འོངས་པའི་འགོ་ཁྲིད་མི་སྣ་གསོ་སྐྱོང་བྱེད་ཆེད་ཡིན། སློབ་ཁྲིད་དང་། གྲོས་བསྡུར། དངོས་སྦྱོང་སོགས་བརྒྱུད་ནས་ཟབ་སྦྱོང་ལ་མཉམ་ཞུགས་གནང་མཁན་ཚོར་ཨ་མེ་རི་ཀའི་ཆབ་སྲིད་ཀྱི་འགྲོ་ལུགས་མཁྱེན་རྟོགས་དང་། ཕྱི་འབྲེལ་སྲིད་བྱུས་གཙོས་འབྲེལ་ཡོད་དོན་གནད་ཐོག་གླེང་མོལ་ཡོང་ཐབས་བྱེད་རྒྱུ་ཡིན། ཡིན་ནའང་ཟབ་སྦྱོང་གི་རྗེས་སུ་མཉམ་ཞུགས་གནང་མཁན་ཚོས་ཨ་མེ་རི་ཀའི་བོད་མིའི་སྤྱི་ཚོགས་ཙམ་མིན་པར་རྒྱལ་སྤྱིའི་ནང་བོད་དོན་དང་འབྲེལ་བའི་ཐོག་ལས་འགུལ་གྱི་འགན་བཞེས་གནང་རྒྱུར་ཕན་ཐོག་ཡོང་ཆེད་ཡིན།

ཆབ་སྲིད་ཀྱི་ཤེས་ཡོན་ཕུན་སུམ་ཚོགས་པའི་མི་སྣ་ཁག་ཅིག་ནས་གཏམ་བཤད་དང་། མཉམ་ཞུགས་གནང་མཁན་རྣམས་ཨ་མེ་རི་ཀའི་གྲོས་ཚོགས་དང་ཕྱི་སྲིད་ལས་ཁུངས་ཀྱི་ལས་བྱེད་མཇལ་ཕྲད་ཀྱི་བརྒྱུད་བོད་དོན་ཐོག་ཞུ་གཏུག་བྱེད་རྒྱུའི་གོ་སྐབས་ཡང་ཡོད །

ཟབ་སྦྱོང་ནང་ཞུགས་འདོད་ཡོད་རིགས་རྣམས་ཨ་མེ་རི་ཀར་ཁྲིམས་མཐུན་གནས་ཆོག་པ་དགོས་ཞིང་ཡུལ་འདིའི་མཐོ་སློབ་ཁག་གི་སློབ་ཕྲུག་ཚོར་འབུལ་རྒྱུ་ཡིན་ཞིང་། ཕེབས་མི་རྣམས་ཀྱི་ལམ་འགྲོན་དང་ཟབ་སྦྱོང་རིང་གི་བཞུགས་གནས་སོགས་རྒྱལ་སྤྱིའི་བོད་དོན་ལས་འགུལ་ཁང་ནས་གོ་སྒྲིག་ཞུ་རྒྱུ་ཡིན།

མཉམ་ཞུགས་གནང་འདོད་ཡོད་མཁན་རྣམས་ནས་”བོད་མིའི་སྤྱི་ཚོགས་ནང་དུ་འགོ་ཁྲིད་པ་ཞིག་གང་འདྲ་བྱེད་དགོས་”སྐོར་དབྱིན་ཡིག་ནང་རྩོམ་རིགས་ཚིགས་འབྲུ་༨༠༠ལས་མ་མང་བ་ཞིག་ང་ཚོའི་ལས་ཁུངས་སུ་སྦྲག་ཐོག་གམ་གློག་འཕྲིན། དེ་བཞིན་ཨི་མེལ་གང་རུང་བརྒྱུད་བསྐུར་གནང་དགོས། རྩོམ་མཉམ་རྒྱབ་བརྟེན་གྱི་ཡིག་ཆ་དང་ཁྱེད་ལ་འགོ་ཁྲིད་བྱེད་རྒྱུའི་ནུས་པ་ཡོད་པ་སྟོན་ཐུབ་པའི་འབྲེལ་ཡོད་ཡིག་ཆ་རྣམས་ཟླ་༣ཚེས་༣༡དང་དེ་གོང་གི་ཚེས་གྲངས་གང་རུང་འཁོད་དགོས་ཡོད།  ང་ཚོས་མཉམ་ཞུགས་གནང་མཁན་མང་ཤོས་༡༠ཙམ་དྲག་འདེམས་བྱེད་འཆར་ཡིན་ན་དེ་ལུགས་དགོངས་འཇགས་ཡོད་པ་ཞུ།

ཟབ་སྦྱོང་ཐོག་གནས་ཚུལ་དགོས་རིགས་དང་ང་ཚོར་འབྲེལ་གཏུག་གནང་རྒྱུའི་ཁ་བྱང་ནི་གཤམ་གསལ་ལྟར་ཡིན།

Tibetan Youth Leadership Program
International Campaign for Tibet
1825 Jefferson Place, NW
Washington, D.C. 20036
Tel: (202) 202 785 8591
Fax: (202) 785 4343
Email: tylp@savetibet.org

རོ་ཝལ་བོད་ཆེད་ཐེབས་རྩའི་སློབ་སྟོན་ཚོགས་ཆུང་ནས་སྤྱི་ལོ་༢༠༡༥ལོར་བོད་མིའི་ལས་འཆར་བདུན་ལ་རོགས་དངུལ་གནང་རྒྱུ།

རོ་ཝལ་བོད་ཆེད་ཐེབས་རྩའི་སློབ་སྟོན་ཚོགས་ཆུང་ནས་སྤྱི་ལོ་༢༠༡༥ལོར་བོད་མིའི་ལས་འཆར་བདུན་ལ་རོགས་དངུལ་གནང་རྒྱུའི་ཐུགས་ཐག་བཅད་པ་དང་། ལས་འཆར་དེ་རྣམས་བོད་མིའི་ཤེས་ཡོན་
སློབ་གསོ་དང་། བུད་མེད་ནུས་སྟོབས། འདྲ་པར་འགྲེམས་སྟོན་ལས་གཞི་སོགས་ཀྱི་ཐད་ལ་ཡིན།

ད་ལོར་བོད་ཕྱི་ནང་ནས་ལས་གཞི་༤༨ལ་རོགས་དངུལ་སྙན་ཞུ་ཞུ་མཁན་བྱུང་བ་དང་རོ་ཝལ་བོད་ཆེད་ཐེབས་རྩའི་སློབ་སྟོན་ཚོགས་ཆུང་ནས་ལས་གཞི་བདུན་འདེམས་ནས་སོ་སོར་རོགས་དངུལ་ཨ་རིའི་ཌོ་ལར་༣༣༤༧ ནས་༧༥༠༠བར་གནང་རྒྱུ་བྱས་ཡོད། ལས་གཞི་དེ་རྣམས་ནི་

༡༽སུད་སིར་བཅའ་བཞུགས་ཆབ་སྲིད་བཙོན་ཟུར་སྟག་སྣ་འཇིགས་མེད་བཟང་པོ་ལགས་སུ་རང་ཉིད་ཀྱི་མི་ཚེའི་ལོ་རྒྱུས་དབྱིན་ཡིག་ཏུ་འབྲི་རྒྱུའི་ལས་གཞི།

༢༽ བཞུགས་སྒར་རྡ་རམ་ས་ལར་ཡོད་པའི་བོད་ཀྱི་འགྲེམས་སྟོན་ཁང་ནས་བོད་ཀྱི་སྐོར་འགྲེམས་སྟོན་གྱི་ལས་གཞི། དྲ་ཚིགས། www.tibetmuseum.org

༣༽ལྡི་ལིར་བོད་གནས་བསྐྱར་ཞིབ་དུས་དེབ་ཀྱི་དྲ་ཚིགས་ལས་གཞི། དྲ་ཚིགས། www.tibetanreview.net

༤༽ནིའུ་ཡོག་བཅའ་བཞུགས་ལྕགས་རི་ཤར་ཐུབ་བསྟན་ཉི་མ་ལགས་སུ་བོད་ཀྱི་ལོ་རྒྱུས་དང་འབྲེལ་བའི་སྒྲ་བརྙན་ལ་སོགས་ཐོག་ལས་གཞི། དྲ་ཚིགས། www.conservetibet.org

༥༽རྒྱ་གར་དུ་ཚེ་རིང་དབང་མོ་ལགས་སུ་ལ་དགས་ཁུལ་འབྲོག་པའི་ལོ་རྒྱུས་འདྲ་པར་བརྒྱུད་ཞིབ་འཇུག་ལས་གཞི།

༦༽བཞུགས་སྒར་རྡ་རམ་ས་ལར་ནང་ཆེན་ཉེར་ལྔའི་ལོ་རྒྱུས་རྩོམ་སྒྲིག་ཚོགས་ཆུང་དུ་ལོ་རྒྱུས་ལས་གཞི།

༧༽བཞུགས་སྒར་རྡ་རམ་ས་ལར་བོད་རྒྱལ་ཡོངས་རྩེད་རིགས་ཚོགས་པར་བུད་མེད་རུ་ཁག་སྦྱོང་བརྡར་ལས་གཞི། དྲ་ཚིགས། http://tibetansports.org/

རོ་ཝལ་བོད་ཆེད་ཐེབས་རྩའི་སློབ་སྟོན་ཚོགས་ཆུང་གི་ཚོཌ་མི་ལྕམ་ཊེ་རི་ བྷེ་ཀར་(Terri Baker) ནས་འགྲེལ་བརྗོད་གནང་གསལ་ལ། “ད་ལོའི་རོ་ཝལ་ཐེབས་རྩའི་རོགས་དངུལ་ནི་ང་ཚོར་མཚོན་ན་སྔར་ལས་ལྷག་པའི་
དོན་སྙིང་ལྡན། གང་ཡིན་ཞུས་ན་ཟླ་༩ནང་ང་ཚོ་རྒྱལ་སྤྱིའི་བོད་དོན་ལས་འགུལ་ཁང་གི་སྐུ་ཚབ་དང་ལྷན་དུ་རྡ་རམ་ས་ལར་བསྐྱོད་རྒྱུ་བྱུང་བ་དང་། དེར་འདི་སྔོན་རོགས་དངུལ་བཞེས་མི་འགའ་ཞིག་མཇལ་རྒྱུ་བྱུང་བ་དང་། ཁོང་རྣམས་ཀྱི་ལས་འཆར་རྣམས་དངོས་སུ་མིག་གིས་མཐོང་རྒྱུ་བྱུང་། ཁོང་ཚོའི་ལས་འཆར་རྣམས་ཚད་ལྡན་ཡིན་པ་དང་། ཁོང་ཚོའི་སྙིང་རུས་སོགས་ནས་ང་ཚོར་སེམས་འགུལ་ཐེབ་སོང་། རོ་ཝལ་ཐེབས་རྩའི་རོགས་དངུལ་ནས་ཁོང་ཚོར་བོད་ཀྱི་རིག་གཞུང་དང་ངོ་བོ་གོང་སྤེལ་གྱི་དམིགས་ཡུལ་འགྲུབ་ཆེད་རོགས་སྐྱོར་བྱེད་ཡོད་པ་དེར་ང་ཚོར་དགའ་སྤོབ་བྱུང་། ང་ཚོས་ཁོང་ཚོ་དང་རྒྱལ་སྤྱིའི་བོད་དོན་ལས་འགུལ་ཁང་གིས་རོ་ཝལ་ཐེབས་རྩའི་ཆེད་ནུས་པ་བཏོན་གནང་བ་དེར་བཀྲིན་བསམ་ཤེས་བྱེད་ཀྱི་ཡོད།”

རོ་ཝལ་བོད་ཆེད་ཐེབས་རྩའི་དམིགས་དོན་གཙོ་བོ་ནི་བོད་པའི་སྤྱི་ཚོགས་ནང་དང་ཡང་ན་ རྒྱལ་སྤྱིའི་སྟེང་ལ་བོད་ཀྱི་སྒྱུ་རྩལ། བོད་དོན་དྲིལ་བསྒྲགས། ཁོར་ཡུག་སྲུང་སྐྱོབ། བུད་མེད་ཀྱི་ཐོབ་
ཐང་སོགས་ཀྱི་སྐོར་ལ་བྱས་རྗེས་འབུར་དུ་ཐོན་པ་སྐྲུན་པའི་བོད་མི་སྒེར་དང་། ཡང་ན་ཚོགས་པར་
མ་དངུལ་གྱི་ཐད་རོགས་སྐྱོར་བྱེད་རྒྱུ་དེ་ཡིན།

རོ་ཝལ་བོད་ཆེད་ཐེབས་རྩ་ནི་སྐུ་གཤེགས་པོ་སྒེ་ལེན་རོ་ཝེལ་དང་སྦར་སྦ་ར་རོ་ཝེལ་རྣམ་གཉིས་ཀྱི་
དྲན་གསོ་ཆེད་བཙུགས་པ་ཞིག་ཡིན། ཁོང་གཉིས་ནི་བོད་ཀྱི་བློས་ཐུབ་གྲོགས་པོ་ཡིན་ཞིང་། འདྲ་པར་
དང་རྩོམ་རིགས་བརྒྱུད་ནས་བོད་ཀྱི་གནས་སྟངས་དང་རིག་གཞུང་སོགས་མི་མང་མང་པོར་ངོ་སྤྲོད་
གནང་ཡོད་། ཁོང་གཉིས་སྐོར་གྱི་གནས་ཚུལ་རྒྱས་པ་དྲ་ཚིགས་འདི་
www.mountainlight.com ལས་མཁྱེན་ཐུབ། ཁོང་གཉིས་འདས་གྲོངས་རྗེས་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་
ལྷན་ཚོགས་དང་། ཁོང་གཉིས་ཀྱི་ནང་མི་མཛའ་གྲོགས་རྣམས་ནས་ཁོང་གཉིས་ཀྱི་དམིགས་འདུན་མཐའ་
འཁྱོངས་ བ་དང་དྲན་གསོ་ཆེད་རོ་ཝལ་བོད་ཆེད་ཐེབས་རྩ་འདི་བཙུགས་པ་རེད་།

སློབ་སྟོན་ཚོགས་ཆུང་གི་ཚོགས་མིའི་ཁོངས་སུ་སྐུ་ཞབས་John Ackerly, Conrad Anker, David Breashears, Jimmy Chin, Bob and Beth Cushman, John Jancik, Terri Baker, Bob Palais, Tony Rowell, and Nicole Rowell Ryan བཅས་ཡོད། ཐེབས་རྩ་སྟངས་འཛིན་གནང་མཁན་རྒྱལ་སྤྱིའི་བོད་དོན་ལས་འགུལ་ཁང་ཡིན།

རོ་ཝལ་བོད་ཆེད་ཐེབས་རྩའི་སྐོར་རྒྱས་པ་དྲ་ཚིགས་འདི་ནས་མཁྱེན་ཐུབ་པས་ཐུགས་ཞིབ་གནང་རོགས

༄༅། །ཤུགས་ལྡན་རྗེས་འདྲང་པས་རྔམ་སྟོན་བྱེད་བཞིན་པར་རྒྱལ་སྤྱིའི་བོད་དོན་ལས་འགུལ་ཁང་གི་བསྒྲགས་གཏམ།

༄༅། །རྒྱལ་སྤྱིའི་ཤུགས་ལྡན་སྤྱི་ཚོགས་ཟེར་བའི་མིང་ཐོག་ནས་ནང་པ་འགའ་ཞིག་གིས་རྔམ་སྟོན་བྱས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་ལ་བདོ་བའི་བྱ་སྤྱོད་སྤེལ་གྱི་ཡོད་པའི་ཐོག་རྒྱལ་སྤྱིའི་བོད་དོན་ལས་འགུལ་ཁང་ལ་དངངས་འཚབ་བྱུང་།
གནད་དོན་དེ་རྩ་འཛིན་འཕེར་བ་ཡོད་མེད་ནི་ནང་པའི་མཁས་པ་ཚོས་གཟིགས་རྒྱུ་ཡིན་། འོན་ཀྱང་ང་ཚོའི་བློ་འཚབ་ནི་ཤུགས་ལྡན་རྗེས་འདྲང་པ་རྔམ་སྟོན་བྱེད་མཁན་ཚོས་བོད་ཀྱི་གནད་དོན་སྤྱི་ལ་གནོད་སྐྱོན་ཆེན་པོ་བྱེད་ཀྱི་ཡོད་པ་དེ་ཡིན། བོད་ནང་བོད་མི་ཚོ་རྒྱ་ནག་དབང་འཛིན་པའི་དབང་འོག་དུ་ཡ་ང་སྙིང་རྗེ་མེད་པའི་དྲག་གནོན་འོག་སྡུག་བསྔལ་མྱོང་བཞིན་ཡོད་པ་དང་། གནས་སྟངས་དེ་འདྲ་ཞིག་འོག་བོད་ནང་བོད་མི་ཚོས་རང་གི་སྲོག་ཚུན་བློས་གཏོང་བྱས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་རྒྱུ་དང་བོད་ལ་རང་དབང་དགོས་པའི་འདུན་པ་སྒྲོག་བཞིན་ཡོད།
རྒྱ་ནག་གཞུང་གིས་ཁོང་ཚོས་བོད་དབང་བསྒྱུར་བྱས་པ་དེ་ཁྲིམས་མཐུན་བཟོ་ཐབས་ལ་ལམ་ལྷོང་མ་བྱུང་བའི་འབྱུང་རྐྱེན་དེ་དུས་རྟག་ཏུ་༸གོང་ས་༸སྐྱབས་མགོན་ཆེན་པོ་མཆོག་ཡིན་པར་ངོས་འཛིན་བྱས་ནས་མགོན་པོ་མཆོག་དང་བོད་མི་ཚོ་དབར་འབྲེལ་བ་མེད་པར་བཟོ་ཐབས་བྱེད་ཀྱི་ཡོད། དེར་བརྟེན་རྒྱ་ནག་དམར་པོའི་སྲིད་གཞུང་གིས་༸གོང་ས་མཆོག་གི་ནུས་པ་མེད་པར་བཟོ་བའི་རེ་འདོད་དེ་བསྒྲུབ་རྒྱུར་ རྗེས་འདྲང་པ་རྔམ་སྟོན་བྱེད་མཁན་ཚོས་གཞོགས་འདེགས་བྱེད་ཀྱི་ཡོད། ༡༩༥༩ ལོར་བོད་མི་ཚོས་ཁ་གཅིག་བསྒྲགས་ཐོག་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་། ངོ་བོ་བཅས་རྩ་གཏོར་གཏོང་ཐབས་བྱས་པར་ངོ་རྒོལ་སྒེར་ལངས་བྱས་ཡོད་པ་དང་། དུས་དེ་ནས་བཟུང་ད་བར་གནས་སྟངས་ལ་འགྱུར་བ་གང་ཡང་སོང་མེད།
རྔམ་སྟོན་བྱེད་མཁན་ཚོས་ཆོས་དད་རང་དབང་དང་འགྲོ་བ་མིའི་ཐོབ་ཐང་ལ་སོགས་པ་བེད་སྤྱོད་བྱས་ནས་རང་གི་གནད་དོན་དེ་གསལ་བཤད་བྱ་ཐབས་བྱས་ཏེ་མི་མང་མགོ་བསྐོར་གཏོང་རྒྱུའི་ཐབས་ཤེས་བྱེད་ཀྱི་འདུག ང་ཚོས་ཤེས་ཡག་ལ་ཤུགས་ལྡན་གྱི་རྩོད་གཞི་དེ་མགོ་རྙོག་ཅན་ཞིག་ཡིན་་པ་དང་། མི་རྣམས་ཀྱིས་རྩོད་གཞི་དེའི་སྐོར་ལ་གོ་རྟོགས་གསལ་པོ་བྱེད་ཐུབ་པ་གནང་དགོས། དགའ་ལྡན་ཕོ་བྲང་གི་གཞུང་འབྲེལ་དྲ་རྒྱ་དང་། དབུས་བོད་མིའི་སྒྲིག་འཛུགས་ཀྱི་དྲ་རྒྱ་དང་། དེ་བཞིན་བོད་ཁང་ཐོུང་གི་དྲ་རྒྱ་སོགས་ཀྱི་ནང་རྩོད་གཞི་ཅན་གྱི་གནད་དོན་དེའི་སྐོར་ལོ་རྒྱུས་ཀྱི་རྒྱབ་ལྗོངས་དང་བྱུང་རིམ་རྣམས་གསལ་པོར་བཀོད་འདུག བོད་ཀྱི་ཆོས་དང་རིག་གཞུང་སྲུང་སྐྱོབ་ལ་སེམས་འཚབ་ཡོད་མཁན་ཚང་མས་ད་ལྟའི་དུས་སྐབས་འདི་བོད་ནང་བོད་མི་ཚོས་དངོས་སུ་དཀའ་སྡུག་མྱོང་བཞིན་པར་དོ་སྣང་བྱེད་དགོས་པ་དེ་རེད།
ད་ལྟའི་དུས་འདིར་བོད་ཀྱི་ཆོས་དང་རིག་གཞུང་གཅེས་སྲུང་ལ་ཐུགས་འཁུར་ཡོད་མཁན་རྣམས་ནས་བོད་མིའི་བདེ་སྡུག་གི་འབྱུང་ཁུངས་ངོ་མ་གང་ཡིན་པ་དེར་གཟིགས་དགོས། གལ་ཏེ་ཤུགས་ལྡན་རྗེས་འདྲང་པ་རྔམ་སྟོན་བྱེད་མཁན་ཚོས་བོད་མིའི་ཆོད་དད་རང་དབང་དང་འགྲོ་བ་མིའི་ཐོབ་ཐང་སྲུང་སྐྱོབ་ལ་དངོས་འབྲེལ་བློ་འཚབ་བྱེད་ཀྱི་ཡོད་ན་རང་ཕྱོགས་ཀྱི་ཁེ་ཕན་ཁོ་ན་མ་བསམ་པར་བོད་ནང་བོད་མི་ཚོས་དངོས་ཡོད་དཀའ་སྡུག་མྱོང་བཞིན་པ་དེ་ནས་ཐར་ཐབས་ལ་དོ་སྣང་བྱེད་དགོས་པ་ཡིན། ཤུགས་ལྡན་རྗེས་འདྲང་པ་ཁོ་རང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་བསྐུར་འདེབས་ཞུ་རྒྱུ་ཁོ་ནར་དམིགས་ནས་ནུས་ཤུགས་འདོན་གྱི་ཡོད་ཞེས་ངོས་ལེན་བྱས་ཡོད།

༢༠༡༤ཟླ་༡༠ཚེས་༣༡ ལ།

 

« Previous Entries

Powered by Wordpress | Designed by Elegant Themes